Search


Apr 5, 2014

A Tanbaw Sutin-3


Kar hmasa khan a tanbaw sutin trong upa pahnih - Tlumte thlira thlir ti le Nuhmei varin tuikhur ral a kai nawh ti ei hril fie tah a. Tuta trum chu inhawmthaw takin pali zet ei chai ding a nih. Chonghai chu - Muonglei, Khawzîng, Khawbung a la ti ta deu deu le Sûra umpui mu hriet - tihai hi an nih.


Muonglei
Pielral nisa ka lungrilah a hung var tah,
Ka thla muongleia kal chawiin,
Ka rinumna lawmnan a hung pâr,
Pa thununna ka tuor muolsuo zovin

tiin Pastor Thangngur chun thununna chu tuor laiin rinum hle sien khom a tawpah a ra a thlumzie thu, ringnaa hringnun lampuia inzinhai hlapui ding a phuok a. Hi hla mawina le ropuina chu maksanin thumal pakhat a hmang chauh ei thlûr bing ding a nih.

Ei hlabu buotsaituhai hi Hmar trong an thiem tawk naw lei le an fimkhur tawk naw lei amani ding, hi hla tlar hnina hi “Ka thlamuong leia kal chawiin” tiin an mi siepek a, a hla phuoktu hril tum an inkap threltir duoi a nih. A poi ngot el. Hriet nawna hi an vêt hrim a, inzak nachang le inphalamna chang khom a hriet nawh. Hi thu hi chanchinbua ka ziek hmasa tak chun an mi hung khak sap sap sap a, sienkhom thudik chu kal raka danglam thei a ni naw leiin sut nawkah an hung siem thra tah a nih.

Hi hla hi a chunga ka ziek ang khin, “Ka thla muongleia kal chawiin” tia ziek ding a nih. ‘Muonglei’ ti chu hmun him, tritum a um nawna hmun, hmun ralmuong tina a nih. Pathien thununna tuor muolsuo zoa, pielral nisa, Krista hmangaina varin a lungril inthim a hung elvar hnung chun inthima lawn ta loin, Krista inlalna ram, hmun ralmuonga chun muong takin kal a chawi a, a rinum tuorna po po khom chu lawmna parin a hung inchang ta lem thu a hrilna a nih. A thla a muong leia kal chawi ni loin, Krista angsung, muongna hmun a tlung tak leia hadam taka kal chawi takzie thu a hrilna a ni lem.

Hi hla hi Dr.Rochunga Pudaite haiin film, Beyond The Next Mountain an siem lai khan Saptronga inlet dingin an mi hung fiel a. Hieng hin kan let tah niin ka hriet:

Heavenly sunshine has dawned on my darkened life.
Walking now with peace in my soul,
My sorrows turned into joyfulness,
As I overcame my Father’s chastening trial.

Pipu huna ‘muongleia’ an ngai chin chu chi thum a um. Muonglei-1 chu an khaw sung, kula an inhuon sung, râl le sa an hung lut ngam nawna hmun a ni hmasa tak. Muonglei-2 chu an khaw hnai, mi ri le ar khuong ri khom an hriet phakna chin a ni nawk a. Muonglei-3 chu an ram del chin le huom sung a nih. Tienlai Israelhai khan an ram del chin sung chauh an Pathien humhimna khomin huop phak dingin an ring leiin, Saula’n Davida that tuma a hnot laia an hmelma hlun Filistinhai rama a tlan lut trum khan, “ ‘Fe la, pathien danghai rong va bawl rawh’ tiin LALPA rochung rama ka chanvo hluo ve thei lo dingin an mi hnot suok a ni hi” (1 Samuel 26:19) ti chu a lungkhamna hla a nih. Israelhai ram del puo tieng, Filistinhai ram a lut char khan Jehova humhimna khom chân ta angin an ngai a nih. Mizorama chenghaiin Vairengte kotsuo an kân chara inthoka an inhumhimna chân ta anga inngaina lungril an nei ang hi a nih.

Davidan ‘muongleia’ a ngai chin chu Israel ram, Jehova humhimna thlain a tuom phaka a ngai chin chu a nih. An hung fe pei a, Davida hun laia an lak, an khawpui thar Jerusalemah an hung son hnung chun, hmun thienghlim, muongleia an ngai chu a naupa Solomonin Tempul a hung bawlna Zaiawn tlang le a sevel chu a hung ni nawk ta pei a. Babulon sala intang Israelhai khoma sun-zan zoma an thlir, an Jehova inthrungna dinga an ring le pom chu Jerusalem a nih. Chuleiin, “Iengtin am vai ramah kan Zaiawn hla sak lul kan ta!” an ti rêng a ni kha (Sam 137).

Ei thla muong taka a lêng theina, ‘muongleia’ ei ngai hmun chu khaw lai hi’m a na? Pielral nisa varin a sunna hmuna chêngtu chun thlarau rama a muonglei hmun chu a hriet. Chu hmuna chêng chu inhoi a tiin hnuoia um zingin van nun an tem phak a, a rinumna khom lawmnain a hung par suok hlak a nih. Amiruokchu, chu chu ngaituona le thlarau ram chauh a nih. Chu hmun chaua cheng tumtu, taksaa muonglei hmun ngaisak nawtu chu khuongbai ang char a nih. A hun hma tienga inhumhimna ding ngaisak loin a lâm a lâm a, fak ding a hung tlasam pha leh a taksa a ring a, a kea inthokin a fak tran a, a tawpah a lu a beng thoi a, a riral dêr el ti tienamia ei hril ang char hi a nih. Tisaa muonglei ram le thlaraua muonglei ram hi an inzom tlat ding a nih. Israelhai damkhawsuokna thuruk chu hnam le sakhuo inzomna poimawzie hi an hriet le man fuk chauh ni loa an nuna hringpui hrâm hrâm an tum tlat lei a nih.

Hnam a him naw chun sakhuo khom a him thei naw a, hnam a boral ruolin sakhuo khom a bohmang nghal a nih. A thawa thaw loa, a trongtrai inhrât zawng ringota muonglei ram indin tumtu chun a tawpah thrawngaleivir naw chu sîk ding a nei ngai nawh. Muonglei rama ei ngai indin tum a, ei sum le pai nei sún sù inro phal loa ei deng khawmna, sienkhom keikhawmtu ni loa mi vaw dartu ni si, kohran pawl ram dam hi, khuongbaia ei insiemna chauh a ni thei el di’m ti chîk taka inbi a hun ta ngot el. Chem hi a hmangna dinga hmang chun a trangkai hle a, insatna dinga hmang ruok chun sietna hmangruo an chang hlauh thei a nih. Shakespeare drama Julius Caesar-a zawlneiin, “Beware of the Ides of March” (Thlatrau trongsephur lakah fimkhur rawh) a ti anga kum 2007 lai khoma inkhawmpui hiel koa Delhi tlanga muonglei indin pei dittuhaiin vàn sâla an lo khekpui kha, trongsephur nauhai chun kohran hming sâlin Thlatrau 3, 2013 khan an hung bawsiet tah tho tho a nih ti ei hmuh.

Taksa rama ei muonglei, mimal le ei hnam ta dinga ral muong hmun, a chongpu nina le neitu chan ei chang theina hmun teh khaw lam a um a le? Ei khuolzinna Delhi tlanga Munirka le a sèvêl amanih, in le lo iemani zat ei nei vena Dwarka, Jordan Ral le Vikaspuri, ei Aigupta le Babulon ram hi chu ni kher naw nih. India Danpuia Sixth Schedule humhimna khom ni tak tak bok naw nih. Chu humhimna chu Sixth Schedule huom chin puo tieng, entirnan Delhi tlanga dam lem chu hmang thei a ni nawh. Beiseina rama la um, lien lema Zo hnathlakhai po po hmunkhata ei inhuikhawmna ding Greater Zoram amanih, Hmar hnathlakhaiin “Aw kan Hmar ram inthim, tlang dum dur” tia ei sak kûr nguoi khom hi a la ni phak teu nawh. Chu muonglei chu ei hmathlir Political Shangrila chauh ni lemin an lang.

Khawbung a la ti ta deu deu
Trong hi mana anga a thlawna vana inthoka hung tla a ni nawh. Ei ni tin khawsakna le inzoma hung insiem tung pei a ni lem. Chuleiin trong hi hnam darthlalang a nih. Trong thiem tak tak ding chun a hmangtuhai kalchar hriet inthuk a ngai. Fiemthu nuiza ei tihai khom hi a nuizatna chu a ‘cultural context’ a inthok a ni deu tak. Eini fiemthu tam tak hi Saphai ta dingin nuizat a um dêr naw ang bokin anni fiemthu tam tak hi ei ta dingin nuizat a um nawh.

A chunga tronglamkei (phrase) hi ‘thil awm lo, thil ni lo thaw le hril, a hril rawn po leh ni naw tul tul, thil intu lo deuh’ hrilna a na, sienkhom a hung suok dan kontek (context) hriet naw chun a umzie man ngaina a um nawh.

Mizoram Khawsak Tuipui râl Khawbung khuoa Hmar hnathlakhai an um laiin Sailo lalhai an hung lien a. Anni hnam naw po, anni ngam nawtu chu an bawiah an sie pei hlak a. Lailen hmuna Kairuma Sailo inlal laiin Khawbung khuoa um hai chu an hnam hming indon chieng vong dingin mi a tir a. Tuklut bawia an um nawna dingin tu khomin Hmar an ni thu hril lo dingin a khawtlangin an lo inhril rûk vong a. An ip zo teu vei leh, a tawpah mi ang lo pakhat hi an hang indon leh ‘Hmar ka nih’ a ti el tah a. A khuohai chun an hal sup sup el a. An hang indon chieng nawk leh, “Hmar ka ni tlat chu! Hmara khom Khawbung ka nih” a la ti ta deu deu a. Chuongchun, hi khuoa um Hmarhai chu Sailo lal tuklut bawiah an lut pha tah a nih.

Hi ngirhmuna inthok hin ‘Khawbung a la ti ta deu deu’ ti hi a hung suok a nih. Champhai Biel-a hin Khawbung khuo pahnih a um a, pakhat chu Champhai khuo le inmat Khawbung (North) ti a ni a, tuta Khawbung ei hril ruok hi chu Champhaia inthoka km 70 vela hla, sim tienga um, Khawbung (South) ti a nih. Hi khuo hi Zoram khawvela thu le hlaa mi poimaw le hmingthang thlang khawmhai hrietzingna lungphun an phunna, Hla Kungpui Mual innghatna a nih.

Sûra umpui mu hriet
Ei tienamia mi inlâr tak pakhat chu Sûra a nih. Ama hi mi intlaw tak anga inlang, sienkhom var êm êm si, mi invêtzie hrilfiena dinga anni neka intlaw lem dai anga um dan thiem, dawha nei deu el a nih. Chun, pa huoisen a ni a, mi trîsim phungpuinu khom mana ran anga chai ngam, chu leia sekibusuok khom hlaw ngat a nih. A chanchina inthokin trong hmangruo tam tak a pieng a. Chuonghai chu a umzie hre fie ding chun Sûra chanchin hriet rawn a ngai.

Voi khat chu an khuoa hmeithai pakhat hin ûm a chîng a, ûmpui (big gourd) pakhat chauh a ra a. A lien êm leiin mu hauh dingin mihaiin an ring a, a khuohai chun chîng ve an nuom a, a chi (mu) an hung hni sup sup a. Sûra’n “Hni hni naw ro. Hi ûmpui sunga hin mu khat chauh a um a nih” a ti khom chun, “Sûrbûr, nangin iem i hriet? I bau an kaw lei elin nuom nuomin inpawt naw rawh” an ti lem a. Chu ûmpui chu a tawpah an hang khoi meu chun mu khat chauh a lo nei tak tak a! Chutaka inthok chun ‘Sûra ûmpui mu hriet” ti hi a hung suok a nih. Thil ring/hre dik miel, hre lo dinga mi ngaiin a lo ring/hriet fûk tlat hrilna a nih. Ei hung hmang rawn pei ruok chun, umzie dang met kawka, mani ngaituona tieng chauh invoi ngur mi hrilnan ei hmang bok. Entirnan, ‘Ama hi thu dang hrilpui thei khom an nawh, a ngaizawngnu chauh a Sûra ûmpui mu hriet hlura a ni el’ khom ti thei a nih.

Sûra chanchina inthoka tronglamkei hung suok threnkhat chu hienghai hi a nih: Sûra pelte lo tum ang, Sûra faifuk inhmang ang, Sûra liengko inthlak ang, Sûra bu suong tum ang, Sûra ruol/ruoltlak (upatzie hrilna), Sûra le Nahai siel intrawm ang, Sûra le Nahai ang, Sûra favang lo thlir/bu en ang le a dang dang.

Hieng laia ‘Sûra pelte lo tum ang’ le ‘Sûra liengko inthlak ang’ tihai lem hi chu tulaia ei hnam mizie tarlangna trongkam chieng tak a ni leiin a umzie hriet a poimaw. Mi dangin an thaw thei, mita ei hmu le naa ei hriet, mania thaw thei lo dinga inngaina/insiena lungril put le chu ngirhmuna um chu Sûra pelte lo tum ang a nih. Chu umzie chu ‘nachang hriet lo’ tina a nih.

Trum khat chu Sûra hi khuol an zin a, thil rik fu el hi a put a. Liengko a kham pha a kham nawna tieng ei put inthlak hlak ti an hril chu a hriet zing a. A lieng a hung kham chun khing tienga put son loin an her lêt vut a, a fe vung vung a, zantieng an khuo chu a tlung nawk ta a. An khuo hoi a ti khop el a, tuola inhnelhai dam chu a nauhai angin a hriet a. A tawpah zan bu fa dinga a nuhmeiin a hung ko chun a hriet suok chauh a nih. Ei ram le hnam hmasawn dan hi ei bi chieng chun, Sura liengko inthlak ei hoi khop el. Fe hla ta fu ei insawn a, ei inhnawmna ngaia lan hnawm zing ei ni si.

Khawzing
Van khawpui thar tuola leng lai khin,
Khawzing hnuoiah inrieng an um ngai nawh;
Hringna thing zâr kûr diem diem hnuoiah,
Nunkhuo thara lengin, fiertui inthieng an dawn

ti hi ei kalchar mita inthoka Pastor Thangngurin van ram um dan ding a hmu dan Semruk Hla thluka mawi taka a siem a nih. Hi hla, Adam suon le par lengna khawvel tia intrana hin thina tûrin a fang siet hringnun khawvel lungsietumzie le thi hnunga Krista zara chatuon nun thar changa lêng dinghai ngirhmun ropuizie chu a min entir a. Hieng anga hla ropui hi Zo hnathlak trong tin lai khom.hla dang hmu ding a tam nawh.

Tuta truma ei thlûr nuom ruok chu a hla inrilna le mawina ni loin, a chunga ei hla tarlanga KHAWZÎNG ti hi a nih. HMAR TAWNG HMANG DAN (1997) ti S.N.Ngurte siem, Hmar Literature Society-in Hmar Grammar thrangpuitu dinga a poma chun ‘Khawzing’ ti hi hla trongkama ngaiin, “thing phun zing dur, inchawng” tiin a hrilfie a. Ama hmang dan le inzoma a hrilfie ni ngei ding a na, chu chu ei hrietpui si naw leiin hang thluoi (comment) rak ngaina khom a um nawh. Ka ring dan ruok chun, kum tina pi le puhaiin kum khata pieng naute po po inhlanna ‘Khawduop’ an siem chânga tuolzawla thing zîng khupa an phun tlar leh ‘Khawzing’ ti hi a ngaisuol pal a ni el thei.

Pastor Thangngur kha hla phuok a thiem chauh ni loin trong hmangruoah a hausa a, a hmang fimkhur a, a khap suol ngai nawh niin an lang. Ei kalchar tukvera inthoka ei kalchar mit ngeia ei ram thar zuon chu fie taka ei hmu theina dingin thu le hla a siem a. Hi ei hla tar langa ‘Khawzing’ a ti khom hi tu laia ‘Pathien’ ei ti hi a nih. Pipuhai khan an suongtuona thla kiin a hawl phak ang chin peiin Pathien an ring dan khom a hung insiem tung pei a. Dannaranin, hnuoi le van le iengkim siemtu, iengkim chunga thuneitu, mihriem ta dinga thil thra thaw hlaktu, hnam vengtu le humhimtu umin an ring a, chu chu hming hrang hrangin an ko a, an kona hming laia pakhat chu ‘Khawzing/Khuozîng’ ti hi a nih. ‘Khuonu/Khuopa’ khom an ti tho. Chu chu tuta ‘Pathien’ ei ti hi a nih. Hebrai mihaiin Elohim amanih El Shaddai an ti leh hin thuhmun an ni el thei.

Khawzîng/Khuonu/Khuopa/Khuovang/Pathien bâka hin mihriemhai sukna thei le vangduoina intlun theitu thlarau amanih ‘huoi’ tam tak umin an ring a. Khuoa hri intlun thei chu ‘Khawhri’ (khuo+hri) an ti a, ram tienga mi chu ‘Ramhuoi’ (ram+huoi) an ti thung a. Chuong huoi chi hrang hrang chu hlêma suklungawi tumin an inthawi hlak a, an biek tak ruok chu Khawzing/Pathien a nih. Pathien an biekna thilthaw chu ‘sakhawhmang’ an ti a, ramhuoi tlon lungawi tuma an biek chu ‘inthawi’ an tih. Chuleiin, ramhuoi tlon lungawi tuma an inthawina le Pathien an biekna chu danglam tak a nih. Ramhuoi chu hlêm lungawi an tum laiin Pathien chu inza taka biein a hmaah dawvan an kai hlak. Hi lei hin tuta sut mek Baibul (Delhi Version) ah kha hmaa Pathien biekna le inzoma ‘inthawi’ ti trongkam ei lo hmang po po kha ban vong a ni ta a; milim amanih ramhuoi bieknaa chauh ‘inthawi’ ti hih hmang a ni tah.

Pipuhai chun ‘Khawzîng’ hi vana um, a vengtu uichalhai khom sakei vong ni dingin an ring. Khawzîng chu thumal pahnih, khuo+zîng a inthoka suok a nih. ‘Khuo’ chu mihriem chengna hmun a ni ang bokin a chêngtu (thlarau) tina a ni bok. ‘Kan khuo’ (our village) ka ti chun chengna hmun hrilna a na, ‘Ka khuo a sawt, Ka khuo a sik’ ka ti ruok chun keimaa cheng ka ‘thla’ amanih ‘rau’ amanih ka hrilna a ni nawk daih a. Chu neka huop lien lema ka hril chun, ‘Khuo an thieng, Khuo a thra, Khuo a mawi, Khuo a var, Khuo an thim, Khuo a sie’ ka ti chun hnuoi le van, boruok um dan Nature ka hrilna a ni nawk daih a nih. Khawvel le thilsiemhai chunga thuneitu chu ‘Khuo’ ei ti bok a, chutaka inthok chun Khuonu ti trongkam hi a hung pieng a nih. Vangneina mi pe theitu ‘Khuo’ chu ‘Khuovang’ (khuo+vang) an tih. Kristien sakhuo a hung lut hlim khan ‘God’ ti inletna ding hin ‘Pathien’ am ‘Khuovang’ hmang ding ti thuah an insêl nasa hrim a nih. Chuleiin, pipu hlaah, “Chungkhuon a lo rêl maw e, Van khin a lo rêl maw e” an lo ti a nih. Chungkhuo/Chungkhuonu ti chu ei chung vana Pathien tina a nih.

‘Zing’ ti hi Anthropologist F.K.Lehman chun, “House spirits are associated with the term zîng. For instance, when a child reaches the age of a few months, a sacrifice is performed to put it under the protection of its zîng” tiin a ziek a (The Structure of Chin Society, 1963 p.177). Chu umzie chu, ‘Zîng’ chu in le lo vengtu thlarau tina a nih. Chuleiin, van le khawvel le boruoka thuneitu le khuo le in vengtu chu ‘Khawzîng’ tiin an lo ko niin an lang. F.K.Lehman ngeiin, Kristien an ni hnungin Zo hnathlakhai chun ‘Khawzîng’ chu ‘Pathien’ an hung ti ta lem a nih tiin a hril bok. Dr. Jacob Pudaite nuhmei ‘Zingi’ hming khom hi hming mei mei ni lo, insung vengtu, enkoltu le tungdingtu tina a lo ni dai a nih.

Ei pi le puhai Shana an um laiin trâmpui mitsim an tuok thu an hril rop kha hrieng ei ta. Trâm leiin mi tamtak an thi a, a thren an inpêm hmang bok a.

Shan khuoah lênpûr a tlâ,
Mi raza tlân thiera e;
Chung Pathienin Shan zuk siem a,
Shan khuo lung ang ngirna e

tiin hlain an lo phuok hiel a. A kum linaah bu a hung tam nawk a. “Ei Khawzîngin mal a mi sawm a, ei hausain buchangrum fa nawk thei dingin a mi siem nawk tah a ni hi. Chuleiin, ei khaw hnaia mihai khom fielin, ran lukip thatin lawmna ruoi siem ei tiu” an ta, ruoi an thre mup mup el ti an hril hlak bok a. Hienga inthok hin malsawmna vurtua an ngai chu Khawzîng a nih ti a chieng.

Chîk taka ei bi chun, pipui trongkam lo serhai kha umzie nei tak vonga an lo ser a nih ti inhmai ruol a ni nawh. ‘Sakhuo’ ei ti khom hi sa+khuo keikopa an ser a nih. ‘Sa’ chu ei bil, ei nina, ei zung le zam, ei thlarau, Saptronga ‘being’ an ti hi a nih. Hnam dangin ka nina kha hung trawmin, ama bil, a ‘sa’ maksanin hung intuklut/insunglut sien, ka sa a phun tina a na, ka sa a phun (intrawmpui) nia inthokin ‘Keivom’ a hung ni tah a nih. Chuleiin, mihriem zungzam, nina le thlarau ‘sa’ le siemtu ‘Khuonu’ inzomna chungchang thil hrilna ‘Sakhuo’ tia ei pi le puhaiin an inbuk el dam hi theology pakhat chu a tling hrim hrim a, Saptronga ‘religion’ an ti nek daiin a umzie an thuk lem a nih.

‘Khawzîng’ ti hi ei hla tarlanga chauh naw hin chu hla phuoktu dang le thu ziektuhaiin an hmang ka la hmu ngai naw a, Thangngur ngei khomin a hla phuok dangah a hmang ta naw niin an lang. Hlaa a zep sa hnung khom hin a umzie hrie ei tam ta naw a, Hmar trong hmang dan meu lekhabu siemtuhai khomin mêl tama threlin an mi hrilfiepek tah ti ei thu bula khan ei hril ta kha. Hi hin eini trong ngei ei ngaisak nawzie dam, ei pi le pu chanchin hre lovin ei trong thumal tamtak umzie bul hi hriet ruol a ni nawzie dam le ei trong phûm botu ding chu eini ngei ei nizie a sukchieng. Thangngur kha thlarauva suok thu le hlaa mi chawmtu a ni bakah Hmar trong thra humhaltu poimaw tak a na, a hla thuhai hi a umzie hriet tuma ei inchuk zuol nawk sauh nuom a um. ‘Khawzing’ ti khom hi a hlaah lo sie kher naw sien chu inhmang dai tang ei tih. A sie sa khomin ei inhmang trêp a ni hi. Na nei chun hre raw se.

(April 04, 2014. Delhi)

###

No comments :